ایک طرف تو یہ چیز رہی کہ انہوں نے حکومت کو دیکھ کر اپنے آپ کو سرنڈر کیا اور یوں مسلمان ہوگئے۔ ان سے کہا ہے کہ اَسْلَمْنَا (49:14) کہو۔ اپنے آپ کو مسلمان نہ کہو۔ بات اب سامنے آتی ہے اَسْلَمْنَا (49:14) ہم نے سرنڈر کیا ہے‘ ہم اس کے سامنے جھک گئے ہیں۔ ایمان ان صداقتوں کو دل کی گہرائیوں میں اتار لینے کا نام ہے۔ قلب اور دماغ کے کامل اطمینان سے ان صداقتوں کے حق ہونے کے اوپر یقین کرنا ایمان ہے۔ تو کیا پھر کافی ہوگیا کہ یہ مان لیا کہ صداقتیں بالکل صحیح ہیں؟ ایک فارمولہ کے اوپر آپ کا یقین ہوگیا کہ یہ بالکل صحیح ہے‘ اس کو اس طرح سے کرنے سے یہ کچھ ہوجائے گا۔ کتاب میں آپ نے پڑھ لیا‘ اُس کے متعلق ہر ممکن طریقے سے آپ نے اطمینان کرلیا کہ یہ فارمولہ صحیح ہے۔ اطمینان کرلیا اور آپ بس بیٹھ گئے تو کیا جو کچھ دین کا تقاضا ہے پورا ہوگیا؟ وہ کہتا ہے کہ نہیں۔ اس کے بعد اگلا قدم لیبارٹری ہے۔ ٹھیک ہے اب فارمولے کے اوپر عمل کرو‘ یہ جو اگلی اسٹیج ہے ‘ جب تک یہ ساتھ نہیں ملتی قرآن اُس وقت تک خالی مومن ہونے کو کافی نہیں قراردیتا۔ پھر میں دہرادوں‘ اُدھر یہ کیفیت تھی کہ اَسْلَمْنَا (49:14) کی رو سے وہ مومن نہیں قرار دیتا اور جب اس طرح سے اس سارے مرحلے سے گزر کر‘ اس Process (طریق) میں سے گزر کر‘ ان کے اوپر یقین بھی کرلیتا ہے‘ تو وہ کہتا ہے کہ یہ نہ سمجھ لو کہ بس مقصد پورا ہوگیا۔ بھئی! کیوں؟
قرآن تو کسی بات کو بھی بغیر سوچے سمجھے اندھے بہرے بن کر تسلیم کرنے کو قبول ہی نہیں کرتا
نبی اکرمؐ سے کہا گیا کہ وَ مَآ اَنْتَ بِھٰدِی الْعُمْیِ عَنْ ضَلٰلَتِھِمْ (30:53) اندھے کو تو تم صحیح راستے پہ لاہی نہیں سکتے۔ ایک بات یہ ہے کہ وہ قلب کا اندھا ہے۔ اِنْ تُسْمِعُ اِلَّا (30:53) بات تو وہی سنے گا مَنْ یُّؤْمِنُ بِاٰیٰتِنَا (30:53) جو اس طرح سے ہمارے قانون کی صداقت کے اوپر ایمان لائے گا فَھُمْ مُّسْلِمُوْنَ (30:53) اور اس کے بعد اپنے آپ کو ان کے سامنے جھکادے گا۔ اب بات سمجھ میں آئی کہ مسلمان‘ مومن ہوئے بغیر کوئی ہو ہی نہیں سکتا‘ وہ پہلی شرط تھی‘ ورنہ وہ اَسْلَمْنَا (49:14) کے ماتحت آئے گا۔ وہاں سے یہ ہے جو اَسْلَمْنَا اور مُسْلِمْ ہیں۔ اتنی سی چیز ہوئی۔ اور اگر ان تمام طریقوں کے باوجود ایمان لے آیا ہے تو پھر بھی یہ نہیں ہے کہ مقصد پورا ہوگیا‘ نہ بھائی! یوں ایمان لانے کے بعد کہا ہے کہ فَھُمْ مُّسْلِمُوْنَ (30:53) اس کے سامنے جھکنا بھی ہے۔ جھکنے والوں سے یہ کہا ہے کہ یونہی اندھے‘ بہرے بن کر جھکنا نہیں ہے‘ علم و بصیرت کی رو سے جھکو تو مومن کہلاؤ گے۔ علم و بصیرت کی رو سے اس کو حق ماننے والوں کے متعلق کہا ہے کہ اتنا کچھ کرلینے کے بعد یہ نہ سمجھ لو کہ بس مقصد پورا ہوگیا‘ تم نے مسلم بھی ہونا ہے۔ کیا بات ہے اس کی! مسلم سے کہتا ہے کہ مومن بھی ہونا ہے‘ مومن سے کہتا ہے کہ مسلم بھی ہونا ہے۔
